mooncover

ఉందింకా చందమామ

Download PDF ePub MOBI

ఈరేయి గాలి సడిచేయకుండా నిదురించింది

మహాశూన్యంలో ఊదారంగు వలయాలమధ్య

నక్షత్రాలే లేని ఆకాశంలో ఏకాకిగా వెలిగాడు చంద్రుడు

కడలి అలలు కూడా కలల వొడిలో ఆదమరచి నిదురించాయి

అడవిలో వృక్షాలన్నీ నేలపై వాలి నిదురించాయి

నిదురరాని వెన్నెల ఒక్కటే నింగినీ నేలను గుండెలకు హత్తుకుంది

 

తూర్పుపవనపు చిటికిన వేలును పట్టుకుని

వెన్నెలకు తోడుగా నేనూ మేల్కొనేవున్నాను

కౌగలించుకొని నుదుటిపై ముద్దుపెట్టుకొనేందుకు

ఆకాశంకేసి చేతులు చాచి నా చందమామను ప్రేమగా పిలుస్తాను

దిగులు దిగులుగా మెల్లిగా వెన్నెల నన్ను కూడా కమ్ముకుంటుంది

నా చెక్కిలిపై జారిన కన్నీట మెరిసిన చందమామ

పెదవి చివర అట్లా నిలిచిపోయాడు

అందుకేనేమో ప్రేమగా ముద్దు పెట్టుకున్నప్పుడల్లా

ఉప్పనైన చల్లటి ముద్దు మాత్రమే పెదవులపై తొణుకుతుంది

 

తీరని తపన లోనుండి తొలుస్తుంది దివారాత్రులు

మనుష్యులకి ఎందుకింత వేదన

ఎందుకింత ఎడతెగని దుఃఖం

ఎందుకింత వీడని మోహం

లోకానికెందుకీ నిద్రపట్టని దిగులు చీకట్ల అశాంతి రాత్రి

ఉందింకా మనకో చందమామ

ఉందింకా మసక వెన్నెల కాంతి

నేలను ఆవరించే గాలి మేఘాల ఊరేగింపు

నెమ్మదిగా ఎలాగోలా బయలుదేరుతుంది

సముద్రమూ, వృక్షాలు దిగ్గున లేచే సుడిగాలి

ఎటునించో అటునుంచి తప్పక వీస్తుంది

అలలు కేరింతలు కొడుతూ తీరం వెంట పరుగిడతాయి

పరిగకూడా ఏరేసిన జొన్నచేను మంచెపై నిలబడి

ఆకాశంలోకి చూస్తే నా ఒంటరి చందమామ

మంచుపూల వెన్నెల వానలో తడుస్తూ

నాకేసి చూసి ముసిముసిగా నవ్వుతుంది

– విమల

Download PDF ePub MOBI

(Image Courtesy: http://www.flickr.com/photos/darad/3887252196/)

Posted in 2014, కవిత, ఫిబ్రవరి and tagged , , .

డియర్ రీడర్:— రచనతో సంబంధంలేని వ్యాఖ్యలు వద్దు. సంయమనం లేని, ఎవరికీ ఉపయోగం కాని వ్యాఖ్యలు వద్దు. నింద వేరు విమర్శ వేరు, ఎవర్నీ గాయపరచకుండానే విమర్శించవచ్చు. పుల్లవిరుపుగా తీసిపారేయటం వల్ల అసహనం ఉపశమిస్తుందేమో, అంతకుమించి ఒరిగేది లేదు. ఏదైనా నచ్చకపోతే ఎందుకు నచ్చలేదో కాస్త సున్నితంగా, విశదంగా చెప్పండి. వీలైనంతవరకూ మారుపేర్లు వద్దు. మీ వ్యాఖ్యలు పరిశీలన తర్వాతనే ప్రచురింపబడతాయి. వ్యాఖ్యల్ని ఎడిట్ చేసే అధికారం పత్రికకి ఉంది.