cover1

యావజ్జీవం

చిత్తు కాయితం మీదో

ఉత్తి కూనిరాగం లాగో

నిలవనీయకుండా

సలపరించే పుండో

ఎటూ తోచని రాత్రి

కటికి చీకట్లోకే

అదాట్న కిటికీ తీసి

అనాది ప్రశ్నల గంప

తలకెత్తుకు మోస్తావో

సమాధి శిలువల స్మృతులు

తలొగ్గి మూచూస్తావో

మసి చేతుల తడి దస్తూరి

స్వర రాగ వ్యధా కస్తూరీ

పరిమళమే దినసరి కూలి

అనుకుని ఈ అరుగుల డాగుల మీద

పొగ చూరిన ప్రేమల నీడ

Yaavajjeevamమగత నిద్రలో అటు నిటు జరిగే

సాదా జంటలు తడబడి తెరదించి

రాదారికి అటు దూరంగా తిరిగే

ఊదా సంగడి పువ్వుల కోసం

ఏనాడూ కొస నవ్వైనా నవ్వని

బింకపు అన్నల ఇంకిన కన్నుల లోతున

శంకించే తమ్ముల ఱొమ్ముల మాటున

పంకపు తడిలో ఇంకా మిణుకుమనే

చేతననే నీ వేతనమనుకొని

తెలవారే ఝూముకు

పొలమారే లోగొంతుకలో

శ్రోతలు కోరని ఈ వేకువ గీతం

మీ పెద్దల జన్యువు చేసిన నేరం

ఆజన్మాంతం నీకూ నీకూ నీకూ దూరాభారం

సగ సగమా పద పదమని నీకీ పద కారాగారం.

 *

Inspiration: “In My Craft or Sullen Art” by Dylan Thomas

Download PDF EPUB MOBI

రెగ్యులర్ అప్డేట్స్ కోసం కినిగె పత్రిక ఫేస్బుక్ పేజీని లైక్ చేయండి. 

Posted in 2015, కవిత, ఫిబ్రవరి and tagged , , , , , , , , , .

One Comment

  1. “శ్రోతలు కోరని ఈ వేకువ గీతం … నీ పద కారాగారం” బాగుంది సార్. త్రిపుర మెచ్చిన ఫ్రాంజ్ కాఫ్కా కూడా ఇట్టాటిదేదో అన్నట్టున్నాడు
    “Writing is utter solitude, the descent into the cold abyss of oneself.” – Franz Kafka.

డియర్ రీడర్:— రచనతో సంబంధంలేని వ్యాఖ్యలు వద్దు. సంయమనం లేని, ఎవరికీ ఉపయోగం కాని వ్యాఖ్యలు వద్దు. నింద వేరు విమర్శ వేరు, ఎవర్నీ గాయపరచకుండానే విమర్శించవచ్చు. పుల్లవిరుపుగా తీసిపారేయటం వల్ల అసహనం ఉపశమిస్తుందేమో, అంతకుమించి ఒరిగేది లేదు. ఏదైనా నచ్చకపోతే ఎందుకు నచ్చలేదో కాస్త సున్నితంగా, విశదంగా చెప్పండి. వీలైనంతవరకూ మారుపేర్లు వద్దు. మీ వ్యాఖ్యలు పరిశీలన తర్వాతనే ప్రచురింపబడతాయి. వ్యాఖ్యల్ని ఎడిట్ చేసే అధికారం పత్రికకి ఉంది.